خيبة امل

بكيت وهذي جروحي تنازف والسنين تفوت
ولا ليــله خـــبرت إن الفرح لو بالخطأ جانـــي

أطيــح ولو وقفت أوقف على خيبه أمل وسكوت
وأســـيــر وكل شــيٍ عن مسير الدرب ينهــانــي

وأصـيح ولا صـدى يـرجـع وكــني ما رفعت الصوت
وكــن الوقــت مالــه مهنــه إلا بجمــع أحــــزانـــــــي

وكن مالي سوى هم أدوم بداخله مكبــوت
ولا كــن السعــادة خـلقت إلا لجــل تجفـــاني

وأنا اللي ما دريت إني بنفس متيمة للمـــوت
ولا أن الحظ هو اللي قادني لين انه أغــواني

ولا كـن للشقاء غيري على الدنيا شراب وقوت
وأشوف انه عليّ مكتوب أعيش العمر وحداني

وجيت أنبش تلال الرمل أدور حبة الياقــوت
معي ياسـي ليا منى قرّبت انهيه يبدأ بــــــــي

وأقول إن الوفا حلم وضياعه واقعٍ مثبــــوت
ليــا من شافــنـي في جانبٍ خذ جانبٍ ثــانـي

وقلبي مثل طفلٍ ما يميز جمر من بسكوت
ويوم انه شب نفسه شـبـنـي وياها أنهاني

ولي عقلٍ حياته في متاهات الولـــه مفلــوت
على طولت غيابه صرت أقول انه تناساني

يا ويلي والظروف تزيد قسوه والسنين تفوت
أظن إنــي بمــوت أو الفرح بـيـموت مـا جانـي