رغم ما قلته ورغم اللي بقا عنك بقوله
والله ان المدح مهما كان في حقك قليل
بين ما طلته وذاك اللي حلمت اني اطوله
وحدك اللي شفت تحقيقي لقربك مستحيل
كنت اقول الحب قبل يصيبني يسر وسهوله
لين حققني وعشت بقبضته عمري ذليل
ما يفيد نعيش دام ان حلمنا صعب حلوله
وش تســاوي عيشةٍ فيها الفرح ما له دليل
صعب نحيا والأمل غايب ولا يمكن وصـــوله
وإن بكينا من متى صار البكاء يشفي العليل
آه ....ويلي لو غزير الدمع يسعدني هطوله
كان صرت اسعد بشر من كثر ما دمعي يسيل
والهوى لو ما كسبني منه مجد ولا بطوله
يكفي انه جاد لي بك يا عسى عمرك طويل
المحبه بحر وانتي عز ياقوته ولوله
واعتبرتك من يدين الخط لي اعظم جميل
والغرام اللي فتق ظهري وان شايل حموله
ما لـفاني بالهناء حتى ولو عابر سبيل
عمرها ترحال تجتاح الزمن عرضه وطوله
قصدها يومٍ يخفف عنها الهم الثقيل
ان سكت او عاد في بالي حكي ودي اقوله
قلت ( احبك ) وادري ان الحب في حقك قليل
